Ziah Kawlram Cozah Hi An Chiatnak Kaa Khat Chim Ah Thong Thlak Dawh Pei An Si Ko Hi

Aung Than Wai cu Rakhine cozah an chiatnak zong a chim lo nain bia a hal hna ruangah ni 5 ni ah khan thla 6 chung thong tla dingin bia an khiah piak.

A mak hringhran dah hi tluk lawmmam hin maw Kawl cozah hi an va sual hringhran ko. Tukum January thla ah Rakhine ram ah minung 7 ralkap nih an rak thahmi hna kong ah Aung Than Wai nih june thla ah khan a facebook ah ca a taar i cu ruang ahcun a tu hi Rakhine cozah nih thla 6 chung thong an thlak lai.

A ttialmi cu “ kan Rakine stae secretery hlun, hriamnam a tlaitu. A ho dah hi Mrauk-U mithahnak ah hin mawhchiat ding a si? ” tiah a facebook ah ca a rak ttial. Hi ruang ah hin Rakhine cozah nih an celh bak lo i thong an thlak ko.

January thla ah khan anmah Rakhine miphun pawl nih Mrauk-U khua siangpahrang inn hlun ah anmah miphun puai tuah an rak i tim i cozah nih an rak sianh hna lo caah sandah an rak piah, cu ruangah cun ralkap pawl nih meithal in an rak kah hna i minung 7 an thi i minung 12 fak ngaiin an rak i khawng.

Aung Than Wai cu an tlaih i an kalpi lai ah media pawl sinah bia a chim i “ a donghnak caah biahalnak ka ngei. A hodah mipi a kaptu a si? A hodah kahnak nawl a petu a si? A hodah mawhchiat ding a si? ” Tiin tiah media pawl sinah a chim.

Source: mizzima