Tial Cung Thang Coach Aung La Nsang Cu Vawleicung MMA World Middleweight Pathawng Hna He Training La

A ralaimi March 31 ah ONE championship nih Japan ah MMA thuatnak a tuah dingmi puai ah Aung La Nsang cu Japan pathawng Ken Hasaegawa nih a zuam cawh than caah an i thua than lai. Tuan deuh Kawlram Yangon an i thuat lio ah cun Aung La Nsang nih round 5 nak a dih lai teah teng lak a rak thongh i a tei.

Cucu Ken Hasaegawa nih aa cinat lo in tutan anmah Japan ram tuah dingmi ONE MMA velhnak ah Aung La cu a singkhaw than ve nak asi. Hi hna pahnih thongh lai cu vawlei pi nih aa ngeih taktak. An i thuat lai zoh an i ngeih ciomi a si. An thawng veve, Aung La zong tulio ONE ah champion pahnih comi a si lengah Ken Hasaegawa zong siseh anmah Japan ram ah middleweight no.1 an timi a si ve.

Tuan an rak i thuat lio zongah an i tluk pah. An pahnih in a nih nih a tei lai ti chim chung awk a har ngaimi asi. Aung La Nsang zong biatak in training a la ve cang. Vawleicung UFC pathawng hna sin ah training a la. Tutan zongah World Class Middleweight pathawng pahnih  Derek Bruson le Jonas sin ah training a la than. Tih nung bak si ko. Aa thuatnak ding ah ni 16 lawng duh cang.