nu le pa bia ngeih hi nunnak a si, Mipa nih a nu bia a ngeih caah a hawile an thih lioah a luat

Nu le pa bia ngeih cu thluachuah hmuhnak lawng si lo nunnak hrimhrim a rak si. Mipa nih a nu bia a ngeih caah thihnak in a luat bak ve. Nizan tihni Thailand ram motor accident i Kawlram pa a thih lo cu a mak kho tuk. Midang cu a thi len hna, cun a thi lomi zong hma fak an tuar dih nain a nih cun hma zong a hmu lo. An i citmi motor a accident lengah a kaangh caah mi nung tamlak an thi.

Mah thihnak in a luatmi Kawlram pa cu amin ah Lwin Moe Thu a si i Yangon khuasa a si. Thailand ram ah kal in phaisa a kawlmi si. Thadinyut caan teah ka nu le pa ka tlawng hna lai a ti nak ah atu bantuk in motor accident a ton hi a si.

An i citmi motor nih thingkung a pah (teih) cu tikah an motor sii bawm pawl an kuai i a kaang. Motor mawng telh in motor cuangmi minung 15 chungah 9 cu a hmun ah chikhat ah an thi hna, 2 hma fak taktak an tuar i a dang 4 hi hma cu an hmu ve nain tihnung tuk an si lem lo. Cu lakah cun kawlram pa cu hma zong a hmu lo.

Media le tuanvo ngei pawl nih bia an hal, ziah na hawile an thih le hma an hmuh lio ah nang hi na zeihmanh naa khawn lo ning si? zeidah na tuah tiah an hal i a lehmi hna cu,  motor kaa cit lai teah ka nu he phone in kan i chawn i “pathan” rak rel, na rel khawh lo hmanh ah na phone kha rak ong law rak ngai te tiah a ka ti caah ka nu chimmi bantuk tein “pathan” cu ka rel ve caah ka luat tiah ti.

Hma  a pumi midang cu heh tiah motor thlalang an khui i an luat hna nain a nih Kawlram pa cu zei ti a luat zong an thei kho lo. Him bawm tein a luat ko. Motor leng a chuah ning cang zong an thei kho lo. Anmah Buddhist zumhnak cun “pathan” timi a rel ruangah kan pathian nih a luat ter tiah an ti. Hi thil hi Oct. 21 ah a cangmi si.

Ref. Myanmar Daily News