Ni (150) harnak lonh ah lawmhnak

Ni 150 harnak a lonh hnu ah nun nuamhnak a comi Mupi sining hi vun rel than ve. Mupi nih zei bantuk dah a kan cawnpiak. Mupi timi cu thla a ngeimi phundang chim cun a zuangmi va vialte lakah a nun khua a saubikmi a si. Kum 70 tiang an nung kho ve. Sinain kum 40 tluk an si ah zeidah a cang ti cun an thla le an hmur pawl an tlong, an kiak i duhduh in rawl an i kawl kho ti lo. Aa ke tin tiang in a chia dih.

Zei bantuk rawl hmanh a kawl kho ti lo. Dirhmun chiakha taktak ah a um. A pum zong a rit tuk cang. Duh ning in a zuang kho ti lo. Cu tikah duh thimi thil 2  a ngei. Cu ti um i rawl lo thih le ni 150 chung temhtuarnak ton i nun than a si.

Cu ti ni 150 harnak a ton lio caan ah tlangsang pi cungah a um i a bu chungah aa din. Rawl lo bak in a um. Cun a hmur thar a corh zau nak hnga heh tiah a hmur hlun cun lung a cuk. A hmur thar a keumi in heh tiah a thla aa chah, aa phawi. Ni 150 chungah rawl lo a um lengah taksa pum fahnak phun tling a tuar ve.

Sinain ni 150 a tlin tik ah cun thla thar a ngei, hmur thar a ngei i ketin thar te a ngei cang. A note bantuk ah aa chuah ve i hlan bantuk dirhmun ah a phan kum 40 in a dang kum 30 a nung than chap khawh i kum 70 tiang tha tein nung .

Cu ve bantuk cun zumtu harnak kan ton caan tampi a um ko lai. Temhtuarnak kan ton caan tampi a um ko lai, rawl lo ti lo kan um caan a um ko lai sinain cu harnak temhtuarnak kan lonh tikah lawmhnak a um zungzal ve. Cu lawmhnak kan tinco khawhnak hnga harnak kan tei ta a hau. Mupi nih kum 70 nun a duh cun ni 150 chung harnak aa tuar bantuk in nifa kan tonmi harnak hna hi kan tei a herh ve.