Nangmah nak sifak le har tong an tampi

Zeitluk na sifah le lungrethei in na um zongah na lung dong hrimhrim hlah. Nangmah nak mihar le lungrethei Vawlei ah an tam tuk. Nang le kei cu zeitluk kan si a fah hmanh ah a rum tukmi a nungmi Pathian a zummi kan si caah ruahchannak tal kan ngei rih. Vawleicung ah ruahchannak pakhat hmanh a ngei lomi an tamtuk. Zumtu a si ve ko nain nifa tin harnak nih a den cuahmah mi tamtuk an um rih hoi. Cu lak ah nang duhdim tein Inn dai tang te na um khawhmi ruangah Bawipa kha lawm ko.

Phunzai len hlah. Tutan India ram chung ah thlichia a hrang. Cu thlichia cun a hlei in Khrihfa an tam ngai nak, Odisha state a den caah minung tamtuk te umnak an ngei lo. Inn le lo ngeilo an tam kho taktak. Thli nih an inn a hrawh dih. Cu harnak tongmi lakah Zumtu Pathian mifa tampi an i tel ve. Rawl ei awk an ngei lo, din awk ti an ngei lo. Chungsivang pawtam in an um hna.

Cu tluk harsa an um lio ah nang le kei kan paw a khim. Zan ah nuam tein kan i hngilh khawh. Zunput tha tein kan kal kho. Din awk ti, ei awk rawl Pathian nih a kan pek. Cucu kanmah fel ruang le that ruangah a si lo. Amah vel thawng a si. Cucaah na dir hmun te ah khan i lawm law bawipa thangthat ko hmanh. Duhfah hakkauh in um hlah. Pathian an pekmi thluahchuah tu kha hman thiam le rel zia thiam i zuam deuh. Nangmah lawng sifah na si naisai lo, nangmah lungretheimi na si lo. Nangmah nak a zualmi an tamtuk ti hi philh hlah ti kan duh.