Malaysia ah Kawlram puaisa 3 tleih an tong thongthlak an si lai

Malaysia ah phung lo ning in mi a thlahtu le tlunkalnak tuahtu Kawlram puaisa  3 cu an tleih cang hna. HI an tleihmi kawlram mi 3 hna nih hin Malaysia ram ah Kawlrammi kum 11 in kum 20 kar lawngte minung 11 bak te an  luh ter hna.

Cucu Malay palik nih an tleih hna i nizan ah khan Kuala Lumpur biaceih zungah bia an ceih hna minung pakhat ah kum  2 thong tla ding bia an chah piak hna.

HI tleihmi Kawlram puaisa 3 hna hi kan hnu June thla chung ah khan Kawlram mi Malay luhter ruangah an tleihmi hna an si. Mah 3 hna cu kum 19 simi nu pakhat, kum 24 le kum 33 pa an si hna. Biaceih zung chung zongah pheh lo tein an sualnak an phuan ve ko.

Kum hnih thong tla ding an ti hna nain an tleih hna ni June thla in rel piak ding tiah Malay biaceihtu nih nizan ah a chim.

HI bantuk thlithup hmawngkhu in Malaysia kalnak tuahmi hi  an tam taktak. Hi bantuk phung ning lo Malay a luh pitu puaisa pawl cu a tambik kum 15 thong an tla kho ti si. Cucu anmah Malay phung a si ve.

Tutan Kawlram puaisa 3 hi an vantha ti khawh si . Kum 2 cio lawng an tla lai.

Ref. FRA