Kawl ralkap le Naga ralkap an i kaap

Sagaing ram then mah te uknak a lami Naga hriamtlai pawl le Kawl ralkap kar ah kahnak  a chuak. An i kahnak hmun hi Lahee Myone chung ah a si i nizan May 16 zanlei suimilam 2:00 – 6:00 tiang an i kaap tiah theih a si. Naga hriamtlai pawl cu NSCN-K tiah an timi an si. Nihin tiang cun an i kahnak a ruang bik theih khawh a si rih lo. media pawl chim nak cun an khua hrawng phone line a that lo caah an kahnak a ruang bik theih khawh a si rih lo. Duh ning in pehtlaih khawh an si lo tiah an chim.

Naga ralkap NSCN – K pawl hi 2012 April 9 ni khan Cozah he kah deihnak minsen a thumi an si. Tlangcung hriamtlai phu hna lakah kahdaihnak min a thumi phu khat an si ve.Kum 7 a rauh hnu tukum 2019 January thla 29 ah khan anmah Naga NSCN- K zungchoh cu ralkap nih an lak piak hna.

Cu hnu ah anmah Naga ral bawi 5 zong Kawl ralkap nih an tleih hna. Hriamnam tlai dang he pehtlaihnak nan tuah tiah an ti hna i Pohma 17/1 phung ning in Khani Myone Biaceih zung ah bia ceih an si. Tutan an i kah nak a ruang bik zong theih a si lo nain Kawl ralkap nih hin a thli tein tlangcung hriamtlai phu pawl hi a nam pah len ko hna. Ralrin hauh ngai dawh si cang. Kahdaihnak min thu he thu lo he a duh ning in a phomh ko hna. Ref: Mizzima