Jesuh Hmanung bik bia ” Kapa an sual ngaithiam hna, zei kan tuah ti an hngal lo,”

Jesuh hmanung bik bia “kapa an sualnak ngaithiam hna, zei kan tuah ti an hngal lo,” Jesuh nih a thih lai ah vailam cungah bia (7) a chim taak, cu lakah a pakhatnak a chimmi cu “Kapa an sualnak ngaithiam hna, zei kan tuah ti an hngal lo,” ti si (Lk. 23:34). Hihi kan theih zungzalmi bia Pathian bia phuangtu tampi nih an phuan zungzalmi a si. Nain a thar tein a sullam vun ruat than hna u sih tiah kan sawm. Jesuh nih a chim duhsetmi hi zeidah a si timi vun zoh tuah u sih. Hi biafang hi Jesuh nih Amah a that cuahmahmi Rom ralkap hna caah A pa sinah ngaihthiamnak a hal piakmi hna a si.

Zeicatiah Fapa kha mikhamhtu a si an hngal lo, an i fiang lo. An cung dantatnak a tlunnak hngalo Jesuh nih a pa sinah ngaihthiamnak a halpiakmi hna a si. Hi nih a langhtermi cu Jesuh kha Pa sin kalnak lam a sinak le nawlhal piaktu a sinak a langhter. Jesuh loin pa ngaihthiamnak hmuh khawh a si lo zia, Pa ngaihthiamnak loin khamhnak co khawh a si lo zia kha a langhter. Jesuh kha pa sin kalnak lam le pa ngaihthiamnak tawhfung a si.

Amah Jesuh nih vawlei a rat hnawh chan hrimhrim kha Pa le misual pehtleihter a si. Misualmi nih khamhnak kan co i ngaihthiamnak kan hmuhnak hnga caah a ra i a nunnak a pek. Zeitluk in dah dawtnak le velngeihnak a ngeih ti si cun, Amah a that cuahmahmi hmanh a ngaithiam khotu Jesuh a si. Hi nih a langhtermi cu zeibantuk sualnak a ngeimi zong Jesuh nih a ngaihthiam khawh lomi a um lo tinak a si.

Kan hngalh loin kan tuahmi sualnak le nifatin kan tuah cuahmahmi sualnak tiangin a kan ngaithiam khotu a si. Kan cungah dawtnak tling a ngeimi a si. Cucu vailam cungah a langhter. A chim bantuk tein a nunnak le tuahsernak in a langhter. Cucu kan luatnak a si. Jesuh thawngin miluat kan si. Pa thinlungah ngaihthiammi kan si cang. By Tluang Ceu Thang