Hakha Thar Ummi Kan Unau Hna Zaangfah An Si, Ti An Har Taktak Thal Ah Zeitindah An Nun Ning Si Hnga

2015 Hakha Rungtlang cimh le puicimh ruangah umnak ngeilo kan unau tampi cu Nahau tlang le Lungphun tlangah thial an si. Cozah nih anmah le duhthiamnak le dirhmun zoh in inn le hmun pek an si. Inn pekmi an um, hmun i ham in mah te inn a sami an um ve.

 

Minung in cun an tam ngaingai. Inn lawng hmanh inn 1000 leng a si. Tukum he cun kum 3 chung an um cang hna. Atu tiangah ti an hmuh rih lo. Sang thenkhat ah cun anmah tein phaisa an i thawh i ti a lami an um. Ti lak nak ngeilo mi cu ruah ti i rinh in an um. Abik in Nahau le Lungphun tlang ummi cu ti an har khun. Tlangcung an um tikah ti than awk zong um lo.

Cozah ti sermi Timit ti nih le atu tiangah thitha in an pe fawn hna lo. Phiang kum voikhat ah an pek hna, nain din awk le hman awk taktak a tha hoi lo.

Ruah a sur caan ah hin vanthat an ti i cucu an donh hna i a thlathla in an hman. Phaisa ngei deuh nih ti an cawk. Motor voikhat phor ah Ks.20000 in 40000 an liam. Ti a that sile man tam ve.

Atu ning te cun thal ah phan piak an um taktak. Cozah nih zohsawh awk cu a tha bak lo. Upa cu a zia, kan fa nau sianginn kaimi ca ko ah a poi taktak. Kholh tawlnak zong um lo. Ruah ti a kum in an chiahmi bak a hmangmi an um hna.

Ti kongah alung dongmi tampi an um cang. Umnak hlei an ngeih lo caah an i benh chih hna i si ko.

An caah thlacam tal in tang hna u sih. Kum khat hnih silo zungzal umnak ding a si i ti  tha tein a hmuh lo si cun toh awk tha lo a si lai. Chin7News

note: porhmi si lo, anmah Hakha thar ummi he kan i chawnhmi le keimah hmuhmi bak si.