Hakha mino le palik pawl an thiltuahmi tha taktak, i velhnak le buaibainak a karh caah Hakha khua runvennak an tuah

Hakha khua ah a bu in i velh, inn bauh le fir a tam chin lengmang ca ah Hakha Palek Sakhan Hmu hruainak in sang mino le palek i bawm in runvennak an tuah i, October 21 zaan zong ah Dawrhlun sang mino le Khuathar sang mino nih khua runvennak ah palek an bawmh hna.

“Mino he i bawm in runvennak kan tuahnak hi a sau pah cang nain nai hrawng hi a bu in mino pawl aa vel mi, a buaibai mi, inn bauh le fir a tam ca ah a hlei in runvennak kan chap. Zarhpi ni le Zarhpi zaan ah hin a hleikhun in palek thazaang kan hman,” tiah Hakha Palek Sakhan Hmu Duh Yehmu Thein Zaw Oo nih a chim.

Hakha khua nih kan ngeihchun dinhhmun khuacuanhbo le golf tuknak hmun, khua chung tibantuk ah zarh fatin ti tluk in a bu in i velhnak le buaibainak a um i a hlei in Zarhpi ni le a zaan ah a tam bik cu a chuak. Cun motorcycle tlau, inn le dawr bauh tibantuk zong theih lengmang a si. Mifir tlaih khawh mi hna lak ah a tam bik cu tlangval no le tleirawl thi deuh an si.

“Hakha khua ah velh a um ti lo ti awk in kan theih lo nak a sau cang. Nai hrawng in cuka ah an i vel ee, khaka ah an i vel ee ti kan hun theih lengmang than. Tlangval no zuri a ruun in a vaak mi pawl an tam chin lengmang. Zapi hmai ah zu din hi ningzah awk ah an ruat ti lo. Mahte in aa chawk mi ngiar le velh zong zei ah an rel lo. Zaan hrimhrim ahcun chawhvah le lenkai tik ah thin a phaang. Hi bantuk aa vel mi le buainak a chuahpi lengmang mi pawl hi palek nih faakpi in dan kan tatpiak hna seh, a herh ahcun hrem hna seh law a tha lai,” tiah Pyidawtha sang upa pakhat nih The Hakha Post ah a chim.

Hakha Palek Sakhan nih Hakha khua chung sang pakhat ah runvennak uniform zun nga cio an phawt hna i sang mino nih cu uniform cu i hruk in runvennak rian an bawmh hna.

“Zarhpi ni ah hin buaibainak a tam deuh tawn i khua runvennak ca ah a dang tein palek 30 leeng le mino nih tuanvo laak a si. Ni dang ah cun palek 15-20 tibantuk in tuanvo pek an si,” tiah Duh Yehmu Thein Zaw Oo nih a chim rih.

Hakha khua chung lam aa tonnak pawl le khuacuanhbo ah palek le mino nih hmunhma laak in an cawngh i khua a heel mi le thil poipang a can sual i thawngpang thanhnak a um tik ah a kal ding in Palek Sakhan ah tuanvo pek keel mi zong an um tiah thawng kan theih.

Ref.the Hakha Post