Dr,Even Ruak Uk Aa Voi Hnih Nak”PATHIAN PAKHAT AH MI PATHUM”(Three Persons in One God)

Pathian pakhat ah mi pakhat nâk tam an um hrim hrim ti hi zawndamh le ruahnâk sawh sawh si loin Hra. (Gen.) 1:1 le 1:26 le 3:22 le 11:7 Baibal Cathiang hna nih an fianter i an fehtermi a si.

Asinain a cunglei Baibal Cathiang hna nih khin Pathian pakhat ah mi pakhat nâk tam an um nâk kong kha fianter in fehter hmanh seh law ZEI ZAT SET timi tu cu an fianter lo.

Zeicatiah pakhat nâk tam cu pahnih zong a si kho, pa li, pahra thong le ting zong an si kho dih.

Cucaah ZEI ZAT SET timi Baibal cacâng hna kan zoh lai.

Hra. (Gen) 18:2 “A mit in a hun zoh i zohmanh a pawngah mi pathum kha an rak dir…”

Hihi Zumhnâk i kan pa a simi Abraham sinah hmuh khawh a si lomi Jehovah (BAWIPA) cu hmuh khawh in â langh a voi khatnâk a si.

Phun dang in kan chim ah cun ‘Minung nih Pathian a hmuh’ a voi khatnâk a si. Zeitintiah hmuh khawh a si lomi Pathian cu hmuh khawh in â langh caah a si.

Hmuh khawh in â langmi cu Jehovah Pathian a si i a hmutu cu zumhnâk ah pa a simi Abraham a si.

 langmi cu PATHIAN PAKHAT a si i Abraham nih a hmuhmi cu MI PATHUM an si.

Câng khatnâk ah “Abraham cu chun nisat lio a puaninn innkâ hram i a țhut lio ah Jehovah cu Mamre bengkeng thing hna lak ah a sinah â lang”.

A donghnâk hi zoh hmanh, ‘a sinah â lang’ tiah ti a si. Pakhat lawng chimnâk singular form bak kha a hman i “a” tiah ti a si. Zeicatiah Pathian cu pakhat a si bangin Abraham sinah â langmi zong Jehovah (BAWIPA) Pathian pakhat kha a si caah ‘an i lang’ tiah ti loin ‘ â ‘ lang tiah ti a si. Thantlâng holh in kan țial ah cun ” ai ” lang ti a si.

Sihmanhsehlaw Zumhnâk ah pa a simi Abraham nih a sinah â langmi Jehovah Pathian cu a hun zoh tikah MI PATHUM in a hmuh hna. Zeicatiah PATHIAN PAKHAT AH MI PAKHAT si loin PATHIAN PAKHAT AH MI PATHUM an si caah a si.

Cheukhat nih Abraham nih a hmuhmi mi pathum lakah pahnih kha cu vancungmi pei an si ko cu tiah an ti.

Cucu a dikmi a si i el awk a țha lo. Zeicatiah a tanglei kan rel lengmang tik ah mi pahnih cu vancungmi an si ti kha fiang tein kan hmuh i kan hngalh.

Sihmanhsehlaw ruah leh khah a phu tak takmi cu dal 18 câng khat ah khan Abraham sinah Jehovah le vancungmi pahnih an i lang tiah a ti hrim hrim lomi le Abraham nih a hun zoh i mi pathum a hmuhmi ah khan Pathian le vancungmi thleidan khawh loin â ruang tein cân cân khat le hmun pakhat ah mi pathum a hmuhmi kha a si.

Cuticun Baibal lila in kan leh hrim hrim a herhmi biahalnâk pathum hna cu:-

1. Zeiruangahdah hmuh khawh a si lomi Pathian cu hmuh khawh in â langh tikah Mi Pathum theng in â langh?

2. Zeiruangahdah rel cawk lo vancungmi lak ah mi pahnih theng kha i kalpi in Amah Pathian he mi pathum theng an si a herh?

3. Zeiruangahdah Pathian pakhat le vancungmi pahnih kha thleidan awk țha loin â ruang bak in cân cân khat le hmun pakhat ah mi pathum in an langh?

Hi biahalnâk hna lehnâk kha Baibal Cathiang ah rak kawl law a voi thumnâk ah kan i tong țhân te lai.

By:Dr, Even Ruak Uk